
‘ఆరెక్స్ బెనిఫిట్స్’ సామర్థ్య కేంద్రం ఏర్పాటుతో 300 మందికి ఉద్యోగాలు: మంత్రి శ్రీధర్ బాబు.
అమెరికా కేంద్రంగా కార్యకలాపాలు సాగించే ఆరెక్స్ బెనిఫిట్స్ (Rx Benefits) అనే సంస్థ దేశంలోనే మొదటిసారి హైదరాబాద్ లో గ్లోబల్ సామర్థ్య కేంద్రాన్ని(GCC) ఏర్పాటు చేస్తోందని ఐటీ, పరిశ్రమల మంత్రి దుద్దిళ్ల శ్రీధర్ బాబు వెల్లడించారు. ఆ సంస్థ ప్రతినిధులు శ్రీధర్ బాబుతో బేటీ అయ్యారు.
అనంతరం మంత్రి మాట్లాడుతూ వచ్చే రెండేళ్లలో ఆరెక్స్ బెనిఫిట్స్ ఈ సామర్థ్యం ఏర్పాటు ద్వారా300 మందికి ఉద్యోగావకాశాలు కల్పిస్తుందని, రాష్ట్రంలోని ప్రతిభావంతులకు మంచి అవకాశాలు దక్కుతాయని తెలిపారు. ఈ సంస్థ తనకు క్లయింట్లుగా ఉన్న ఫార్మసీలకు లాభాలు పెంచుకోవడంలో తోడ్పడుతుంది. హైదరాబాద్ నైపుణ్య కేంద్రం ద్వారా ప్రపంచ వ్యాప్తంగా ప్రొడక్ట్ ఇంజనీరింగ్ కార్యక్రమాలను నిర్వహిస్తుందని శ్రీధర్ బాబు వెల్లడించారు. రాష్ట్రంలో సాంకేతిక నైపుణ్యం కలిగిన మానవ వనరుల లభ్యత అపారంగా ఉన్నందున బహుళ జాతి సంస్థలకు చుక్కానిగా మారిందని ఆయన తెలిపారు. వ్యాపార విస్తరణకు అనుకూల వాతావరణం ఉండటం, మౌలిక సదుపాయాల పరంగా ఎటువంటి సమస్యలు లేనందున ఆరెక్స్ బెనిఫిట్స్ హైదరాబాద్ ను ఎంపిక చేసుకుందని వివరించారు. ఆధునిక సాంకేతిక, జెనరేటివ్ ఆర్టిఫిషియల్ ఇంటెలిజెన్స్ వేగంగా విస్తరిస్తున్న నేపథ్యంలో వివిధ రంగాల్లో డిజిటల్ పరివర్తన అనివార్యంగా మారిందని చెప్పారు.
సమావేశంలో ప్రభుత్వ ప్రత్యేక ప్రధాన కార్యదర్శి జయేశ్ రంజన్, ఆరెక్స్ బెనిఫిట్స్ సిఇఓ వెండీ బార్నెస్, సిఎఫ్ ఓ థాడ్ క్వియాట్ కౌస్కి, చీఫ్ ప్రాడక్ట్ ఆఫీసర్ శేఖర్ ఖేరా, సమిట్ కన్సల్టెన్సీ సర్వీసెస్ సందీప్ శర్మ, తెలంగాణా లైఫ్ సైన్సెస్ ఫౌండేషన్ శక్తి నాగప్పన్ తదితరులు పాల్గొన్నారు.